紅磡（Hung Hom或者Hunghom）係香港九龍半島嘅舊區，行政上來睇，大部份嘅地方都喺九龍城區內，但亦都有少部份好似香港理工大學、香港體育館同埋香港海底隧道九龍入口喺油尖旺區。
家下呢區多數係住宅樓，公共屋邨同私人屋苑。不過舊時紅磡有工業如黃埔船塢、商業、但隨着舊區重建，拆咗山谷道邨，以及紅磡灣大規模填海，連紅磡碼頭亦都要搬，呢區差唔多係純住宅區。家下新填地有私人屋苑半島豪庭、紅灣半島、香港理工大學學生宿舍等等。
呢區有條海濱長廊可以由海逸豪園經紅磡碼頭行到尖沙嘴，而車亦可以用紅磡繞道短時間直出尖沙嘴。
尖東站係個港鐵西鐵綫嘅中途站，以前東鐵綫嘅南行總站，響香港九龍油尖旺區尖沙咀中間道兒童遊樂場地底，近住尖沙咀東部。
尖東站係東鐵綫第一個地底車站，有全世界最長嘅月台幕門[未記出處或冇根據]，亦係東鐵綫唯一設有冷氣設備同月台幕門嘅車站。尖東站有行人隧道系統連接周圍同荃灣綫尖沙咀站。
響兩鐵合併前，呢個站由九廣鐵路公司（九鐵公司）管理。但響2007年12月2日即係兩鐵合併後，尖東站嘅車站結構，由九鐵公司租畀港鐵公司營運用，同埋合併成為一個車站管理。
2009年8月16號，港鐵公司將伸延西鐵綫，由南昌起至紅磡，而尖東站亦會變成西鐵綫其中一個站。因此，東鐵乘客需要喺紅磡站轉西鐵綫至去到尖東站。1號月台會改為去屯門，2號月台就改為去紅磡總站。
柯士甸站喺香港九龍油尖旺區佐敦西部的柯士甸道西及匯民道[1] 一帶，係九龍南綫一部份（西鐵綫嘅延伸段），喺2008年4月30日平頂[2]。車站服務西九龍一帶，即係西九龍文娛藝術區附近。車站設有行人天橋駁去佐敦道行人天橋，仲可以去埋港鐵九龍站同埋佢啲上蓋物業，以及佐敦道行人隧道。柯士甸站往返各站嘅票價同九龍站相同。
南昌站係港鐵西鐵綫同東涌綫嘅轉車站。個站喺香港西九龍填海區，屬深水埗區；近深旺道、欽州街同東京街西。個站喺地鐵同九鐵合併前係佢哋唯一夾份用嘅站；由九廣鐵路負責土木工程，地鐵負責機電工程。
南昌站嘅路軌同月台喺地面但唔通出去；大堂就喺地底；有4個側式月台，全部有幕門。色係黃同白。機場快綫就喺中間穿過。
美孚站係香港一個鐵路車站，港鐵荃灣綫、西鐵綫都經過本站。荃灣綫大堂同月台，喺美孚新邨萬事達廣場地底，而西鐵綫嘅大堂同月台，就響荔枝角公園入面，兩邊大堂有條喺閘內嘅路連埋，方便人轉車。
荃灣西站係港鐵西鐵綫嘅一個車站，佢喺荃灣海旁，係西鐵綫唯一一個地底車站。雖然荃灣西站唔係接駁港鐵荃灣綫荃灣站嘅車站，但係兩個站之間有專線小巴95K連接（用八達通可以免費由西鐵綫轉車），如果行嘅話就大概要行15到20分鐘。
錦上路站喺香港嘅元朗錦上路西南面，近住八鄉同錦田，係港鐵西鐵綫嘅其中一個車站，呢個站亦係港鐵西鐵綫範圍嘅車廠同總部大樓嘅所在地。呢個站原本叫「錦田站」，當西鐵綫動工嘅時候，錦田同八鄉嘅居民曾經因為車站改名而有所爭拗，最後九廣鐵路公司（以前管理西鐵、東鐵、馬鞍山綫嘅公司）將車站名改做「錦上路站」（錦上路係車站興建嘅時侯最接近呢個站而又分隔錦田同八鄉兩地嘅道路）。車站全長280米，外牆係磚紅色，好有中國傳統特色，另外喺四週圍嘅空地種滿晒樹，呼應四週圍嘅鄉村環境。
