MTR 之旅 - 東涌綫

香港站係港鐵機場快綫同埋東涌綫東面嘅總站，喺中環民祥街地底，車站設有3個月台同9個出口，成個車站結構同香港國際金融中心連住，另喺干諾道中近環球大廈地底設有一個南大堂通往德輔道中同埋中環商業中心區一帶。有兩條隧道去中環站。
呢個站喺環球大廈、干諾道中同埋交易廣場地底用行人隧道連接中環站，乘客可以行去中環站轉荃灣綫或者港島綫。另外，呢個站有市區預辦登機服務，亦都有免費穿梭巴士服務去中環同埋灣仔嘅酒店。

九龍站係港鐵東涌綫同機場快綫嘅一個站，位於油尖旺區嘅西九龍填海區雅翔道。
九龍站有機場快綫市區預辦登機嘅服務，趕時間嘅旅客可以喺九龍站搞定登機手續先，之後就坐機場快綫到機場直接上機。
2009年九龍南綫通車之後，九龍站同東面西鐵綫嘅柯士甸站並非正式嘅轉車站，乘客如果喺兩站間轉乘，無論用八達通定係單程車票，都當兩段車程處理，並要畀再入閘收費。乘客要喺南昌站轉車，先會有再入閘收費調減；乘客如果要享用機場快綫免費港鐵接駁服務去柯士甸站（或相反），要喺青衣站轉東涌綫，再喺南昌站轉西鐵綫（或相反）。

奧運站係港鐵喺香港九龍大角嘴西部新填海區邊嘅車站，嗰個位原本係大角嘴碼頭。呢個站淨係得東涌綫埋站，機場快綫列車會喺呢個站中間嘅通道穿過。而西鐵綫嘅延伸，九龍南綫，會喺佢隔籬嘅深旺道地底穿過。

南昌站係港鐵西鐵綫同東涌綫嘅轉車站。個站喺香港西九龍填海區，屬深水埗區；近深旺道、欽州街同東京街西。
個站喺地鐵同九鐵合併前係佢哋唯一夾份用嘅站；由九廣鐵路負責土木工程，地鐵負責機電工程。
南昌站嘅路軌同月台喺地面但唔通出去；大堂就喺地底；有4個側式月台，全部有幕門。色係黃同白。機場快綫就喺中間穿過。

荔景站喺香港新界葵青區荔景山，係港鐵荃灣綫同埋東涌綫嘅轉車站。個站有4個月台，以兩個島式月台排列，全部月台都裝咗月台幕門。
值得留意嘅係，同荔枝角站一樣，由於鐵路最初起嗰時係由日本嘅西松建設起，而且當時香港嘅製版機都用日本嘅字型，所以站入面嘅名用咗日文漢字「茘」（艸部下面3個刀字），而唔係香港常用嘅「荔」字（艸部下面3個力字）。
又有另一種講法係地鐵早年根據康熙字典茘係正體，荔係俗體，所以地鐵系統內所有帶茘字嘅站名同出口指示都用刀而唔用力。

青衣站係香港一個鐵路站，喺青衣島東北面，港鐵東涌綫同埋機場快綫共用呢個站，亦係青衣島唯一嘅鐵路車站，服務島上近20萬居民。

欣澳係港鐵站，喺香港新界大嶼山東北嘅陰澳打水灣填海區，2005年6月1日啟用，早香港迪士尼樂園3個半月。呢個站設有一個島式月台同埋一個側式月台，本站亦係港鐵第一個設有月台閘門嘅車站。

東涌站係港鐵東涌綫嘅總站，喺新界離島區大嶼山東涌市中心，係東涌市中心唯一，更係離島區第一個鐵路車站及唯一一個地底車站，乘客可以利用東涌站直接往返市區、轉巴士往返香港國際機場或者大嶼山南部以及轉吊車往返昂坪。車站設有2個月台喺島式月台，以預留日後可能伸延至東涌西站，所有月台於啟用前都裝咗月台幕門。